我想起另一樣野想同大家分享既,就係去洗手間。好多人去到街,突然人有三急,週圍搵,我真係覺得呢D野係平日應該做既。平日得閒無事,就一定要想想邊區突然想方便去邊度。
而我去親,一定係最好果間,多數都係酒店,又係有好多人諗(包括龍嫂),唔係幾好意思喎,點會呀,所以我自細都諗,思想真係可以改變一個人既運氣。你換個角度想下,你在酒店打工,有個人埋黎,問你洗手間係邊,唔通你話:"我地洗手間唔外借既." 咁既酒店實執左苙好奈啦,不過真係好少,大部份都係好 nice。
例如灣仔,都無乜邊幾間可揀,我會揀新世紀酒店,一樓,食 buffet 後面,問人都唔駛問,你去到酒店仲有人幫你開門添呀!招呼唔好,但唔駛俾貼士,睇開D啦!
銅鑼灣,而家有好多度都幾好,我覺得崇光 11/F 書店旁唔錯,勝在有冷氣,亦唔駛問人,好乾淨!
另一度係怡東,可能好多人都知,因為有D人都去過怡東食 buffet,你問大堂職員一定叫你去二樓。其實不然,一來二樓要俾貼士,二來個位太窄,三來黑白階磚地,去方便你都頭暈眼花。
因為好少人去過逸東軒,其實三樓既洗手間環境好過樓下多倍!
上到三樓,唔駛入酒樓,在左面側門入,再向右留意個隱敝門口,佢整到好似幅牆咁既,古代咁,行到去一摸,推開,就係個洗手間;果次我帶龍嫂去,龍嫂都好佩服我既能力,佢真係覺得我有D計,銅鑼灣除便一講又可以帶佢去一個無人,乾淨,有冷氣,又唔駛俾貼士既地方。
金鐘唔駛我講,咁多間酒店,是但一間都有洗手間;但我要一提,JW Marriot,呢間又係咁,你問佢,佢會叫你去七樓,其實地下 ball room 落一層轉左已經睇到,個洗手間只係有 function 既時候先有人用,又係好軟淨,都係之前去過 funcation 既人先知道;但佢設計密封,你坐得十分鐘已經無乜氣。
旺角,梗係唔係朗豪坊啦,係朗豪酒店,一幢樓之隔,設備同環境都有天淵之別,絕不需要排隊,亦有冷氣。
佐敦,我建議去恆豐,不過要鎖匙。但唔駛擔心,一樓,餐廳門口問佢拎就得,一樣有冷氣。
無論男女,平時去洗手間要留意下,咁你每年總會有過三十次係好幫到你,你仲要多謝我添!新識男女會好著數嫁,女方會覺得你係一個乜都掂既人,包你加分!幾有安全感呀!要乜有乜;男仔你地知唔知女仔最憎聽到係乜?就係唔知。乜都唔知,咁要你黎做乜呀!呢D就係分別了!
如果睇完覺得都係唔好去,是但算啦,咁我都唔勉強你。但要記住,第一,你唔肯改變你自己,你永遠都無辦法改變你自己,因為無人幫到你;第二,想著眼前的事情就滿足,套用 "鑑證先鋒2" 郭秀芸請曹永廉食和牛果句,"你呢D唔係叫做生活,係叫做生命咯。"
真係一眼睇盡天下事,其實我個人乜都可以講一餐的,因為我八卦,記憶力強,很重視對方反應及觀察身邊事物,呢D係做醒字派玄學家既最基本條件;亦因此,我真係有好多呢D唔會係書本上學到既 "成功本能",同 "小秘技"。
![](../images/p21rWmO7npKpd6nbtEt0Sg.jpg)
順帶一提,我的泰國之旅 blog 就出啦,包你睇完慳番唔少時間同金錢,同埋會食到好多好野!